Fab Lab á Kambsdali Ársins átak 2018

Á árliga vinnudegnum í Norðurlandahúsinum í dag bleiv Fab Lab á Kambsdali kosið Ársins átak 2018. Í grundgevingini segði dómsnevndin m.a.: At tað er alla æru vert, at stigtakararnir til fyrsta FabLab, fyrsta fabrication laboratary, í Føroyum á henda hátt velja at skapa umstøður og áhuga fyri at dyrka kreativitet, vitan og framkomið handverk.”

Páll Isholm, rekari, og Jóannes Djurhuus, leiðari á Fab Lab á Kambsdali tóku í móti heiðrinum. Páll Isholm takkaði fyri stóra heiðurin og segði m.a.:”FabLab á Kambsdali er til øll, sum búleikast í Føroyum. Vit vilja gera okkara til at veksa um Føroyar og skapa einar betri Føroyar. Vit vilja skapa eitt netverk og eitt stað, eisini í Føroyum, har fólk við góðum hugskotum kunnu koma og gera síni hugskot til veruleika.”

Í sambandi við at Fab Lab á Kambsdali er kosið ársins átak 2018 verður verkstovan opin fyri almenninginum alla komandi frá klokkan 13 til 18. Tá eru øll vælkomin at kunna seg um verkstovuna og royna útgerðina.

Les eisini: Takkarrøða Ársins átak

Les eisini: Grundgeving fyri Ársins átak 2018