Fab Lab stevna á Kambsdali

Fab Lab stevna á Kambsdali

Alla vikuna hevur Fab Lab Nordic Boot Camp 2019 verið á Kambsdali. Tað er Fab Lab á Kambsdali, sum á Vinnudegnum í heyst bleiv kosið ársins átak, sum er vertur fyri stevnuni.

Tiltakið er eitt árligt tiltak, har Fab Lab í norðurlondum møtast og umrøða ymisk viðurskifti av felags áhuga. Hvørji nýggj og spennandi tól eru, hvussu styrkja vit norðurlendska samstarvið og hvussu kunnu vit menna samstørvini við fólkaskúla, miðnámsskúla og universitetsumhvørvi, eru millum spurningar umrøddir eru.

Eitt ynski hevur í fleiri ár verið at formalisera eitt norðurlendskt samstarv, og ætlandi verður hetta samstarvið endaliga skipað á stevnuni á Kambsdali, sum endar í dag.

Fab Lab starvsfólkini hava sjálvsagt eisini nýtt høvið at samstarva um ítøkilig projekt og harvið veita og taka ímóti íblástri frá hvørjum øðrum. Eisini hevur verið vitja ymsastaðni. M.a. á Looknorth í Klaksvík, og vóru luttakararnir sera hugtiknir av tí, sum har fer fram.