Føroyingar í norðuratlantiskum flokki

Føroyingar í norðuratlantiskum flokki

Í summar kundu føroysk ung á fyrsta sinni søkja inn á eina norðuratlantiska náttúrubreyt, har næmingarnir taka fyrsta árið í Danmark, annað árið í Føroyum og Íslandi og triðja árið í Grønlandi.

Tvær føroyskar gentur, Femja Poulsen og Angela Djurhuus, ganga í flokkinum, sum byrjaði í summar, og sum kemur til Føroya komandi ár.

Norðuratlantiski flokkurin, tá hann byrjaði í summar.

Talan er um eina royndarverkætlan millum fýra studentaskúlar í fýra ymiskum londum. Samskipanin hevur sjálvandi stóran týdning, og í tí sambandið hava lærarar av Kambsdali verið í Danmark og lagt námsætlanir saman við lærarum úr Gribskov Gymnasium, Verzlunarskoli Islands og GUX Sisimiut.

Á ferðini fingu lærarar eisini høvi at síggja, hvussu næmingarnir húsast í nýbygdum lestraríbúðum í Gribskov. Í Føroyum og Íslandi skulu næmingarnir búgva privat, og í Sisimiut í Grønlandi búgva tey í einum skúlaheimi.

Maria Gregersen, Sigrun Skálagarð og Nikolina Olsen, lærarar á Kambsdali, saman við Angelu Djurhuus, sum gongur í fyrsta norðuratlantiska flokkinum.

– Útbúgvingin fer at víðka um norðurlendska sjónarringin hjá næmigunum og er eitt gott tilboð til tann, sum vil hava øðrvísi og spennandi avbjóðingar, segði Páll Isholm, rektari, fyrr í ár í samrøðu við Kringvarpið.

Náttúruvísindaliga breytin, sum næmingarnir taka, fevnir m.a. um biotøkni, arktiska tøkni, støddfrøði og alisfrøði.

Femja Poulsen vísir Magna Høgnesen, lærara og samskipara á Kambsdali nýggju lestraríbúðirnar, ið eru reistar við danska studentaskúlan í samband við, at føroyskir, íslendskir og grønlendskir næmingar skulu ganga har.
Lærarar úr fýra londum leggja felags námsætlanir.

Royndarverkætlanin koyrir í fimm ár. Tað vil siga, at komandi tvey árini kunnu eisini onnur føroysk ung søkja inn á norðuratlantisku náttúrubreytina.

Ovasta myndin: Føroysku næmingarnir saman við Magna Høgnesen, samskipara, og Mariu Gregersen, lestrarvegleiðara.