148 studentar á Kambsdali

148 studentar á Kambsdali

Fríggjadagin var próvhandan á búskapar-, fyrireikingar-, hug- og náttúrubreytini á Kambsdali. Í ár vóru tað 148 studentar, sum fingu prógv. Próvhandanin fór fram í Ítróttarhøllini á Kambsdali, har eini 800 fólk vóru komin saman hendan merkisdag.

Í røðu sínari til studentarnar legði Páll Isholm, rektari, dent á stóra týdningin av breiðum almennandi útbúgvingum í dagsins samfelag. Hann segði m.a.:

”Ein dygg almennandi útbúgving er avgerandi. Vit verða áhaldandi bombarderað við ófiltreraðum boðskapum frá teimum, ið vilja hava tamarhald á okkara tonkum, og algoritmur og tilgjørdur intelligensur stýra eisini alsamt meira. Tí er avgerandi, at vit duga at skyna á, hvat er rætt, og hvat er skeivt, at lesa millum linjurnar og duga at seta í samanhang. Tann, ið ikki dugir tað, kann skjótt villast inn í hugsanir og hugburðir, ið bróta niður tað samfelagið, ið forfedrar og -møður hava bygt upp til okkara at menna víðari. Dygg almenn búgving er grundleggjandi fyri eitt sunt fólkaræði, og eitt samfelag við vælútbúnum borgarum er eitt samfelag, sum er ført fyri at menna seg í skiftandi umstøðum.”

Til próvhandanina spældu Gwendolyn Philbrow og Súsanna Sólstein hvør sítt klassiskt tónleikaverk á ávíkavist cello og violin.

 

Eisini framførdu næmingar í a-stigsflokkinum í tónleiki tvey løg.

Eftir próvhandanina var drekkamunnur á skúlanum.

Næmingarnir, sum høvdu bestu próvmetini á teimum fýra breytunum fingu heiðurslønir fyri góðu avrikini, og næmingurin við bestu uppmøtingini fekk eisini heiðursløn. Viðurkenningar vóru eisini lætnar næmingunum, ið hava umboðað endaflokkarnar í næmingaráðnum í ár.