Jákup Eyðun 70 ár

Jákup Eyðun 70 ár

Mánadagin í hesi vikuni var rundur føðingardagur í Miðnámi. Tað var Jákup Eyðun Joensen, lærari í lívfrøði, sum fylti 70 ár. Í hesum sambandi skipaði skúlin fyri hugnaligum hátíðarhaldi í kaffipausuni mánamorgunin.

Jákup Eyðun hevur undirvíst miðnámsnæmingum í lívfrøði, líka síðan Studentaskúlin við Gøtugjógv varð settur á stovn í 1982. Og sum Kári Purkhús vísti á í síni røðu, so er Jákup Eyðun lítið broyttur øll hesi árini:

– Tú ert ikki niðurslitin, kropsburðurin er fattur og kropsrørslurnar framvegis kimiligar. Og enn ert tú líka skemtingarsamur og vinarligur.

Orsøkina helt Kári vera, at Jákup Eyðuni altíð hevði dámt so væl at undirvíst, og hann hevði ment sín egna hóvliga og hugnaliga frálærustíl, har næmingarnir altíð tyktist hugsavnaðir.

Dánjal Petur Højgaard hevði eisini nøkur góð orð til starvsfelagan, og Óli Wolles, undirvísingarleiðari, handaði føðingardagsbarninum eitt blómutyssi. Harumframt sang kvinnukór mannað við lærarum nakrar sangir fyri Jákupi Eyðuni.